Konsešuvdnaproseassat Finnmárkkus
2024 čavčča sádde NČE gulaskuddamii 11 bieggafápmo- ja 4 fápmojođasplána Finnmárkkus. Gulaskuddanáigemearri lea 01.02.2025.
Fápmu ja industriijalokten Finnmárkui
Cuoŋománu 8. b. 2023 almmuhii ráđđehus fápmo- ja industriijaáŋgiruššanplánaid Finnmárkkus, "Fápmo- ja industriijalokten Finnmárkui". Ráđđehus čujuhii váilevaš neahttakapasitehtii ja váttis fápmodillái, ja ulbmil lea buoridit fápmodili.
Dán geažil áigu NČE boahttevuođas vuoruhit meannudit fápmolinjá- ja fápmobuvttadanohcamiid Finnmárkkus, koordinerejuvvon proseassas. NČE deattuha ahte mearrádusat dáin áššiin galget leat seammalágánat go eará konsešuvdnameannudeamis, mas leat konkrehta vihkkedallamat birrasa ja servodaga ovdamuniid ja hehttehusaid ektui juohke ovttaskas áššis.
NČE unnida áigeguovdilis prošeavttaid logu Finnmárkkus
NČE bijai áigemeari cuoŋománu 22. b. 2024 dieđihit ođđa plánejuvvon fápmobuvttademiid Finnmárkkus. Oktiibuot lei NČE ožžon 26 ođđa fápmobuvttadanplána Finnmárkkus áigemeari sisa. Dát leat ollu eanet go maid sáhttá hukset, ráddjejuvvon neahttakapasitehta geažil ja oppalaš váikkuhusaid geažil sámi kulturdoaimmaheapmái, lundui ja birrasii.
NČE lea čađahan álgosillema prošeavttaid dáfus, unnidan dihte logu prošeavttain mat sáddejuvvojit gulaskuddamii. Ođđa sillen čađahuvvo go mii leat ožžon eanet máhtu prošeavttaid birra, gulaskuddamiid, konsultašuvnnaid, gulahallančoahkkimiid ja čielggademiid bokte.
Prošeavttaid vuoruheapmi
NČE fágaidrasttildeaddji joavku lea árvvoštallan prošeavttaid, ovttasráđiid guoskevaš suohkaniiguin.
Prošeavttat mat jotkojuvvojit ja sáddejuvvojit gulaskuddamii 2024 čavčča leat:
Kjøllefjord/Gilevuotna bieggafápmorusttet
Skjøtningberg bieggafápmorusttet
Svartnakken bieggafápmorusttet
Laksefjorden/Lágesvuotna bieggafápmorusttet
Oksefjorden/Vuoksavuotna bieggafápmorusttet
Nordkyn/ Čorgaš bieggafápmorusttet
Bjørnviktuva bieggafápmorusttet
Skarvberget/Sieidi bieggafápmorusttet
Rubbedalshøgda/Básečearru bieggafápmorusttet
Hamnefjell/ Hámmanoaivi 3 bieggafápmorusttet
Reinelva/Reainnejohka bieggafápmorusttet
Fápmojohtasat
2024 čavčča sáddejuvvojit maiddái 4 fápmojođasplána gulaskuddamii:
132 kV Áttánjohka–Gilevuotna–Donjevuotna
132 kV Skáidi–Smiervuotna–Honnesváhki
420 kV Davvesiida–Sáttovárri
132 kV Storvarden–Revnes ja ođđa Revnes transformáhtorstašuvdna
Goas sáhtán addit cealkámuša áššái?
2024 čavčča sádde NČE guoskevaš prošeavttaid vuosttaš gulaskuddamii. Gulaskuddanáigodagas, mii bistá sullii 5 mánu, sáhttet buohkat buktit cealkámušaid NČE:i. Mii áigut maiddái lágidit diehtojuohkinčoahkkimiid ja konsultašuvnnaid.
Ođđa gulaskuddanvuorru dollojuvvo maŋŋel go čielggadeamit leat dahkkon ja ohcamat leat ráhkaduvvon. Dat dáhpáhuvvá árvideamis 2026:s.
Plánejuvvon bargu ovddasguvlui
NČE vuolggasadji lea ráđđehusa mihttomearri oažžut ođđa fápmobuvttadeami nehttii ovdal jagi 2030.
- 2024 čavčča: NČE sádde áigeguovdilis dieđihemiid gulaskuddamii árračavčča 2024, mas gulaskuddanáigemearri lea dálvet 24/25.
- 24/25 dálvvi: NČE mearrida čielggadanprográmma ja bidjá áigemeari ohcamiid sáddemii.
- 2025: Doaibmaálggaheaddjit čađahit čielggademiid ja ráhkadit ohcamušaid.
- 2026: NVE pláne sáddet ohcamiid gulaskuddamii.
- 2027: NVE dahká mearrádusa konsešuvnna hárrái.
Mii fuomášuhttit ahte leat ollu bealit mat sáhttet váikkuhit stuora áššiid konsešuvdnameannudeami ovdáneapmái, ja ahte áigeplána sáhttá rievdat.
Sámegiel jorgaleamit
NČE lea bivdán ahte váldooasit áššiin mat sáddejuvvojit gulaskuddamii, jorgaluvvojit davvisámegillii. Gáibádus guoská čoahkkáigessui, ja kapihttaliidda boazodoalu ja eará sámi beroštumiid birra. Mii leat maid bivdán kárttaid main leat báikenamat sámegillii.