Kraftsituasjonen veke 12, 2024
Større prisvariasjon i sørlege Noreg
Det var små endringar i vekesprisane i Noreg frå veka før, men det var større prisvariasjon gjennom veka. I helga var prisen i Sørvest- og Søraust-Noreg (NO2 og NO1) nede i 12 øre/kWh. Då var det mykje vind- og solkraftproduksjon på kontinentet. Danmark, Tyskland, Nederland og Storbritannia fekk mange timar med null eller negative kraftprisar. Dette bidrog til låg produksjon i sørlege Noreg og full import på mellomlandsforbindingane. Eit slikt driftsbilde gir utfordringar i kraftnettet i sørlege Noreg. Som eit tiltak i forkant av denne situasjonen, reduserte Statnett importkapasiteten frå både Sverige (SE3) og Storbritannia på laurdag og søndag.
På det høgaste hadde Sørvest- og Søraust-Noreg ein kraftpris 180 øre/kWh. Dette var på onsdag ettermiddag då det var høgt forbruk og lite vind- og solkraftproduksjon på kontinentet. Flaskehalsar i nettet mellom prisområda bidrog til at Vest-Noreg (NO5) hadde ein meir stabil pris enn Sørvest- og Søraust-Noreg gjennom veka. Kraftprisen i Vest-Noreg vart ikkje med opp på dei høgaste prisane i vekedagane, eller ned på dei lågaste prisane i helga.
Last ned kraftsituasjonsrapporten for veke 12 2024.
Vassmagasinstatistikk
Les meir om vassmagasinstatistikk her.
For fleire detaljer, sjå: www.senorge.no/map.
