Kraftsituasjonen veke 49, 2020
Høg norsk kraftproduksjon og auke i kraftprisar
Dei norske kraftprisane gjekk opp i veke 49. Den gjennomsnittlege kraftprisen var 15,6 øre/kWh. Dette er ein auke på 8,7 øre/kWh frå veka før. Oppgangen hadde blant anna si årsak i auka forbruk, høgare prisar i utlandet og tørrare vêrvarsel.
Den samla kraftproduksjonen i Noreg auka ytterlegare i veke 49. Det vart produsert heile 3,77 TWh. Samanlikna med tidlegare år er dette særs mykje, gitt dei milde temperaturane for veka.
Forbindelsen mellom Aust-Noreg og Sør-Sverige (NO1-SE3) fekk full overføringskapasitet mot slutten av veka. Det har vore mykje avgrensa overføringskapasitet på denne forbindelsen i år. No er det derimot ikkje planlagt vedlikehald og tilhøyrande avgrensingar før i april 2021.
