Kraftsituasjonen veke 45, 2023
Høg vasskraftproduksjon og stor prisforskjell mellom sørlege Noreg og Sverige
Vasskraftproduksjonen auka i sørlege Noreg (NO1, NO2 og NO5) førre veke, og auka var særskilt tydeleg i Sørvest- og Vest-Noreg. Her auka produksjonen med høvesvis 30 og 42 prosent samanlikna med veka før. Sørvest-Noreg hadde den høgaste produksjonen over ein veke sidan slutten av januar i år. Auka hang saman med høg fyllingsgrad i fleire av vasskraftmagasina i området og høgare kraftprisar på kontinentet samanlikna førre veke.
For første gong sidan mai var vekeprisen i Søraust- og Vest-Noreg på 1 kr/kWh. Prisen var nesten 40 øre høgare enn i Sør-Sverige (SE3). Her var vekeprisen på 60 øre/kWh. To faktorar bidrog til prisforskjellen: Høge prisar på kontinentet i helga grunna lite vindkraftproduksjon i Nord-Europa, og avgrensingar i overføringskapasiteten mellom Sør-Sverige og Søraust-Noreg. I Sverige bidrog høg kjernekraftproduksjon til lågare priser enn i nabolanda. På grunn av utfordringar i kraftflyten gjennom Sør-Sverige er det ei avgrensing på kor mykje Sør-Sverige samla kan eksportera til Søraust-Noreg og Danmark (DK1), ofte kalla sumavgrensing. I periodar der Danmark har høgare kraftpris enn Søraust-Noreg, og Søraust-Noreg høgare enn Sør-Sverige, vil det vera høg kraftflyt frå Sverige til Danmark. Då vil sumavgrensinga gi prisforskjellar mellom Søraust-Noreg og Sør-Sverige sjølv om den installerte kapasiteten mellom områda ikkje er fullt utnytta.
Last ned kraftsituasjonsrapporten for veke 45 2023.
NB: NVE har oppdaga ein mogleg feil i datagrunnlaget for forbruket i NO2. Vi er i kontakt med vår leverandør av data for å undersøke dette. Dette påverkar følgande tabellar og figurar i rapporten: Tabell 6 og 7, og figur 12 og 13.
Vassmagasinstatistikk
Ved utgangen av veke 45 var fyllingsgraden i magasina i Noreg på 79,5 prosent. Gjennom veka gjekk magasinfyllinga ned med 2,6 prosenteiningar.
Les meir om vassmagasinstatistikk her.
For fleire detaljer, sjå: www.senorge.no/map.