Status - kva skjer no?
Etter flaumen i 2014 har Voss herad og NVE arbeidd med alternative løysingar for flaumsikring. Vi har fått utarbeidd ein moglegheitsstudie og hatt eit større forprosjekt for å vurdere alternative sikringstiltak langs Vossovassdraget. Forprosjektet vart presentert i Voss heradsstyre 18.juni 2020. I etterkant av dette var det semje mellom heradet og NVE å gå vidare med ei detaljvurdering om det er mogleg å etablere lokale tiltak på Vangen og ved Evanger sentrum.
Lokale tiltak kan bestå av flaummurar i kombinasjon med pumpestasjonar, og ev. avleiingskanalar oppe i liene for å hindre mykje lokaltilsig. For å kunne dokumentere om lokale tiltak i form av flaummurar har tiltenkt effekt/verknad, er det viktig å ha oversikt over kor permeable massane er og korleis og kor mykje vatn som strøymer i grunnen. Ein skal òg ta omsyn til drikkevasskjelda til Voss sentrum. For å kartlegge dette er det engasjert konsulent for å etablere ein grunnvassmodell for Vangen.
For å utarbeide ein god modell trengs det instrumenterte grunnvassbrønnar. Etablering og instrumentering pågår og dei siste grunnvassbrønnane skal vere på plass og ferdig instrumentert i løpet av september 2023. Brønnane vert plassert på kommunal grunn. I etterkant av dette startar konsulenten opp med å lage ein grunnvassmodell.
Figuren under syner oppinnstrumenteringa som pågår no. Grønne sirklar er nye grunnvassbrønnar på land. Blå er ny målestasjon i elv. Svarte sirklar syner brønnane som eksisterar frå tidlegare.
Vossovassdraget er eitt av dei vassdraga i Noreg som er best instrumentert. Totalt vil det bli:
- 9 + 8 (nye) grunnvassbrønnar
- 2 +1 (ny) målestasjonar i elv
Parallelt med lokale tiltak vert det arbeidd vidare med vurdering av flaumtunnell. Det er m.a. etablert ein målestasjon i Raundalselvi og vi begynner no å få tilstrekkeleg datagrunnlag for å kunne rekne på kor mykje vatn det vil vere mogleg å ta ut av vassdraget høgt i Raundalen. Den hydrauliske vassdragsmodellen som vart etablert i forprosjektet vil verte oppdatert med nytt datagrunnlag ila hausten 2023.
